Sa puso ng bawat Misa, ang musika ay nagsisilbing tulay sa pagitan ng lupa at langit. Itinatanghal nito ang ating mga espiritu, inilalapit tayo sa Diyos, at hinahayaang makibahagi tayo nang ganap sa mga banal na misteryo. Sa pamamagitan ng aklat na ito ng mga awiting pang-Misa, hangarin namin na mapalapit ang bawat kongregasyon sa pagsamba, at mapalalim ang ugnayan sa Diyos sa pamamagitan ng pagdiriwang ng Banal na Misa gamit ang mga awiting ito—mga awit na hinugot mula sa Salita ng Diyos at sa yaman ng ating pananampalataya. Ang “Misa Kangkong” ay iniaalay sa lahat ng mga mananampalataya na nagnanais pagyamanin ang kanilang pakikilahok sa pagdiriwang ng Misa, sa lahat ng mga koro at musikero na nangunguna sa ating pagsamba, at sa buong komunidad ng mga mananampalataya na, sa pamamagitan ng awit, ay patuloy na nagpapalakas sa Simbahan.

Bawat awitin sa “Misa Kangkong” ay isinulat nang may buong puso at pananalig, naglalayong itaas ang papuri sa Diyos at maging daluyan ng panalangin ng Simbahan. Matagal na naming hinahangad na makahanap ng mga awit para sa Misa na mas malapit sa kasalukuyang estilo ng liturhikal na musika—mga awit na, bagama't bago, ay nananatiling tapat sa mga tradisyon ng ating pananampalataya. Ang mga himig at liriko ng mga kantang ito ay sumasalamin sa kagandahan ng pananampalataya at umaakay sa mas malalim na pakikilahok sa pagsamba. Ang bawat awit ay isang paanyaya—upang magkaisa sa diwa ng pagsamba, pasasalamat, at pagninilay sa walang hanggang pag-ibig ng Diyos na isinasabuhay sa Banal na Misa.

Ang aklat na ito ay hindi lamang iniaalay sa mga mananampalatayang nagnanais pagyamanin ang kanilang pakikilahok sa Misa, kundi lalo na sa mga indibidwal na may inspirasyon sa musika—mga kompositor, koro, musical arrangers, at iba pa. Nawa’y mas lalo pang dumami ang mga musikang maaari nating awitin para sa pagdiriwang ng Banal na Misa. Bilang mga kasapi ng Iglesia Filipina Independiente, sama-sama nating pagyamanin ang ating pananampalataya at palawakin ang ating musikang pang-simbahan upang higit na magpahayag ng papuri sa Diyos at magbigay ng inspirasyon sa bawat isa.

Tulad ng sinasabi sa Mateo 25:14-30, "Ang Kaharian ng Langit ay katulad ng isang tao na umalis at ipinagkatiwala ang kanyang mga ari-arian sa kanyang mga alipin. Ang isa ay binigyan ng limang talento, ang isa ay dalawa, at ang isa ay isa, ayon sa kakayahan ng bawat isa." Nawa’y mapagnilayan natin ang talinghagang ito na gamitin at pagyamanin ang mga kaloob na ipinagkatiwala sa atin ng Diyos, at ipalaganap ang Kanyang pagmamahal sa pamamagitan ng musika. Pro Deo et Patria!