Una sa lahat, nagpapasalamat ako sa Panginoon para sa Kanyang gabay, inspirasyon, at walang-hanggang pagpapala sa buong paglalakbay na ito. Sa ating mahal na patron ng “Kristong nakapako sa Krus”, sa pamamagitan ng Kanyang biyaya, nabuo ang songbook na ito. Isang taos-pusong pasasalamat din sa lahat ng naging mahalagang bahagi ng proyektong ito. Ang inyong walang sawang suporta, pagpapalakas ng loob, at dedikasyon ang naging puso ng aming mga pagsusumikap.

Kay Kuya Cesar Dumayag at sa People 360 Consulting Inc. sa mainit na pagtanggap at pagpapagamit ng lugar, pagpapakain, at sa hindi-matatawarang suporta hindi lamang sa Koro kundi sa buong kongregasyon na siyang nagbigay-daan sa pagkamalikhain at pakikipagtulungan, kaya't naging kasiyahan pawang makabuluhan ang bawat pagtitipon.

Sa Koro ng Kathedral ng Kristong nakapako sa Krus, sa inyong sipag at dedikasyon na siyang bumuhay sa bawat nota. Kay Glen Aranzanso na siyang nagturo ng mga awitin sa Koro at naging “layout artist” ng songbook na ito. Ang inyong pagkasigasig sa bawat ensayo ang siyang bumubuhay sa ating musika, na siyang nagiging sama-samang pagpapahayag ng pananampalataya at debosyon.

Kay Don Onel Ballesteros na siyang naging katuwang ko sa pag-areglo. Sa aking pamilya at mga kaibigan, ang inyong matatag na paniniwala sa misyon na ito ay naging tanglaw ng inspirasyon. Maraming salamat sa pagsuporta sa akin sa bawat hamon at tagumpay.

Sa lahat ng naglaan ng kanilang oras, lakas, at mga mapagkukunan: ang inyong kabutihan at pagkabukas-palad ay lubos na nagbigay-halaga sa proyektong ito upang maging isang magandang obra.

Isang karangalan ang maghabi ng ating pananampalataya sa mga himig na tumatagos sa puso. Nawa'y magbigay-inspirasyon, magpalakas ng loob, at maghatid ng tuwa ang mga kantang ito sa lahat ng aawit nito.